For ordens skuld: Dette er sjølvironi, ikkje ein kontaktannonse. Det er ikkje eingong sikkert at Jardar ikkje har kjærast (faktisk har han kjærast og er gift med henne). Og sidan so mange kjem hit ved å søkja etter «nakne jenter» på Altavista og Yahoo og Google slikt (ja, eg har kika i loggen), so bør eg vel òg presisera at du heller ikkje finn porno her.

Og no når me er kvitt grisene, kan me halda fram med det meir høgverdige.

Kvifor har ikkje Jardar nokon kjærast?

... sånn bortsett ifrå at han ikkje akkurat er ettertrakta:

Han har ikkje nokon kjærast fordi han er fødd utan.
For å få ein kjærast må ein vera to. Jardar er berre éin.
Jardar likar jenter med forstand. Jenter med forstand likar ikkje Jardar.
Det finst betre alternativ enn Jardar.
Mange jenter har sagt at Jardar er snill og grei og klok og fantastisk kjernekar, og at det er rart at Jardar ikkje har kjærast, men ingen av dei kan sjølve tenkja seg å vera kjærast med honom.
Jardar er ikkje so desperat at han vil ha ei jente som tek til takke med Jardar.
Jardar er veldig kresen på jentene. Jentene er like kresne tilbake.
Dei jentene som ikkje er kresne, dei er Jardar veldig kresen på. Det er fire jenter som har vore interesserte i Jardar, og dette seier gjerne noko om kva slags jenter som føler seg tiltrekte av honom:
- Fyrst var det ei som ikkje hadde eige vit, og ho var difor ikkje noko for Jardar.
- So var det ei som var desperat og trong eit fast punkt i livet sitt og i livet til dottera. Ikkje noko for Jardar.
- Den tridje var psykisk utviklingshemma.
- Den fjerde var emosjonelt forvirra (men ho tok seg snøgt inn att), og no lurer Jardar på korleis den femte vert.
Kort sagt: Jardar likar ikkje slike jenter som likar Jardar.
Dei jentene som likar Jardar, og som Jardar likar, finn seg i staden andre gutar i siste eller nest siste augneblink.
Somme jenter vert vonbrotne eller fornærma dersom Jardar likar dei, og skjenner på honom for det, og særleg når dei på førehand har lagt ned forbod imot at akkurat Jardar skal lika dei.
Dei jentene som ikkje vert vonbrotne eller fornærma, lurer på kvifor ein sånn snill og grei og klok og fantastisk kjernekar ikkje har kjærast.
For å ha hellet med seg på dette feltet må ein ha profesjonell kompetanse.
For å få profesjonell kompetanse på dette feltet må ein trena.
Den som er amatør på dette feltet, vil aldri få sleppa til i treningsrundane.

Keisamt er det i alle fall ikkje.

Det finst opptil fleire plagiat av denne sida. Merk at det er dette som er den opphavlege sida, og at det er eg, Jardar Eggesbø Abrahamsen, som har skrive alt her på eiga hand.